رن الجــــــــرس

( ( رن الجــــــــرس ) )






رن الجرس !!
حطوا على ابواب المدارس حرس
إذا الحياة مجموعة قصص ..
المدرسه مجموعة حصص ..
وقـــّــف ياصديقي هنا .. تأمل وصوّر
كل ألم قاسي .. وكل طقــّـة بتوجع !؟
ياشقي وياسعيد ..
احمل شنطة العمر فوق كتفك ..
امسك قلم .. وبرايه .. وهندسة
هي الحياة الغريبة .. بتشبه أيام المدرسة !




الحصة الأولى : ولادة طفل ..


هي مرحلة فيها تحدي .. واعجاز آيه ..
القلم !! بيكتب أيام عمرك .. والعمر بتبريه برّايه ..
والهندسة .. بترسم شقاء او سعادة ..
احتفلنا .. ايي احتفلنا بيوم ميلادو
جابو هدايا للولد ..
وهديك بنت لبّسوها طوق!
فجأة بلا سابق وعد
مرت الحصة سريعة .. بدون مايشعر حدا!



رن الجرس






حطوا على ابواب المدارس حرس


ثاني الحصص : روح الطفولة
هي اجمل مرحله واصدق احساس
الناس بتشوف في عيونك براءة
وحضرتك !؟ .. مابتشوف الناس ناس !
كل همك العاب .. وسلة الحلو .. والملاهي
بتعيش عمرك بدون هموم .. ساهي ولاهي !
فجأة !!.. بلا سابق وعد ..
بتمر هالحصة سريعة .. ولاحدا بيحس !


رن الجرس







حطو على الساحة حرس
وقت الفرصة!!.. أو الفرصة من الوقت .. مناخود نفس ..
واحد مننا ضلو صاحي .. والتاني غلبو النوم ونعس
واكيد في الحظة ..
بتمر هالفرصة سريعة ولا يبشعر فيهاحدا


الثالثه : ثورة مراهق
هنا .. تتشابك الرغبات وتضيع المبادئ ..
يومين متسلط عنيف .. ويوم هادي ..
ماتعرف مين بيصلح ئلك .. ومن ترافق !؟
وماهي مشكلة كيف تفهم نفسك ! او كيف نفسك تفهمك ؟
المشكلة كيف انا وانت انتوافق ..
تمر هالحصة سريعة ولايبشعر حدا !



الرابعة : شباب وفتوة


هنا هنا .. استثمر القوة ..
دينك والوطن محتاجك .. تعيد امجاد اجدادك
وتعزز ثقافة هالبلد !
انتبه !
لاتمر هالحصة بدون .. (اصرار بنت وبصمة ولد)!




الخامسة : رجولة
مستوى .. مو أي شخصن يطوله ..
وفي هالوقت بالذات ..
اذا بدك تكون فعلا رجل !! .. خليك رجل ..
هاد يلي ممكن قوله ..




السادسة : صرت شايب
ماعاد باقي أكتر ماراح
شو فيك ياعمي ؟ اكيد انك تعبت ؟ من حقك هلئ ترتاح ...
خلص بيكفي جهاد وصبر
وانت مابتقدر على السير .. رجل في الدنيا ورجل في القبر ..!
يالله حسن الختام .. واغفر له قبل يرقد في اللحد ..!
عمنا خرّف .. وماعاد بيعرف حدا ..!




الحصة الأخيرة : لـ وين المصير؟
رن الجرس ..








حطو على ابواب المصلى حرس
حان وقت الصلاة .. ياعباد اللــه ..
صلو صلاة الغائب .. على الضمير الغائب ..
المستتر بأول العام الدراسي .. المنتهي بـ آخر العمر الأساسي
فضلا .. اجمعو الطاولات .. ورتبو وضع الكراسي !
وقتها .. بيدور في نفسك ونفسي سؤال !؟
كيف مرت اسابيع الدراسة من العمر ..
وكيف مر العمر بلا دراسه .. !!
نعم .. وصلنا النهاية بلا سابق وعد .. ومن غير مايشعر أحد !
اليوم انا وانت .. ياشقي .. ياسعيد !
هي هيك حياة المدرسة .. هي هيك مدرسة الحياة ..
فصل طلاب الرسوب وفصل طلاب الكفاح ..
فصل سعيد .. قطعا حقق اسباب النجاح ..
وفصل شقي .. اشبع العمر فوضى ..؟ .. وصد وجحد !!
والنتيجة للأسف .. لم ينجح أحد !!!؟