الحب عبر الأنترنت حقيقه أم وهم؟

تذكير بمساهمة فاتح الموضوع :

الحب عبر الأنترنت حقيقه أم وهم؟؟؟ هل أنت (مع) أو( ضد) هذه العلاقه؟؟

صفحة تلو صفحه..وصفعه تلو صفعه.

شاشة وأصابع ...

ونفوس تنفث مابجعبتها من كلمات وأفكار ومشاعر

فمنهم من يأتي بعبق الياسمين والمسك

ويزيد بحضوره الأمان والسرور من عبير تواجده

ومنهم من ينفث سماً ويترك آثار عفن قلبه على الصفحات

وبين كفتي ميزان تتأرجح مشاعرنا بين الحب والكره

بين التقبل والنفور

تختلف الآراء.....تتوحد آراء..تتشابك علامات استفهام

لتخرج بنتيجة مبهمة المعاني

لماذا نكره رسم حروف لشخص ما دون الآخر؟؟؟

ولماذا نحب أناس آخرين؟؟؟

برغم أن كلا الطرفين يستخدم وسيلة واحده

ألا وهي

لوحة مفاتيح .....وحروف.....وكلمات

من أين تأتي تلك المشاعر ؟؟

الحب أو الكره ؟؟؟

الحب عبر الأنترنت

أسئله كثيره ومتشعبه كلها تصب ببوتقة واحده وهي :

*هل هذه العلاقات والمشاعر حقيقه أم خيال نرسمه بأيدينا؟؟

*أيُعقل أن يكون لهذه الشاشه مشاعر تصل للقلب ؟؟

*هل هذا الحب .. وهم أم سراب؟

*هل يثمر هذا الحب لعلاقة حقيقه؟

*على ماذا يبنى هذا الحب ؟؟ وماهي الركيزه لمشاعر الحب تلك؟

*أهي الكلمات التي نقرأها أم أحاسيس داخلنا تلد دون إرادتنا؟؟؟

*وماهي الصوره المستقبليه لهذه العلاقه ؟؟

*هل أنت مع أو ضد هذه العلاقه؟

هذه تساؤلاتي اطرحها بين ايديكم لنصل الى ((الحقيقه الغائبه))؟.!؟.!

مع تقديري وحبي للجميع

NaBeELoOo كتب:: هلق انا بحس انو مو غلط
بس برايي لازم تمر العلاقة بمراحل
اولا التعارف عالنت والاخد والعطي
وبعدين يشوفو بعض
وطبعاا هي اهم شغلة لانو بتكشف الانسان على حقيقتو وبتشوفو
متل ما هو مو متل ما انت متصورو
لهيك هي اهم المراحل
وبعدين يكفو عالنت عالتلفون على السطح
وين ما بدون
يعني انا بفضل انو يكون بس طريقة للتعارف مو اكتر
وما حدى يضحك على حدى ويقلو بحبك بدون ما يشوفو
لانو يمكن يكون مو خرج او ما بيستاهل
على كل موضوع ما فيك تحطو باطار واحد لانو كل واحد عندو رايي وطبع

شكرا نبيل لردك الجميل ,
أنا معك إنو العلاقة ما بتنشأ بين يوم و ليلة بدها مرحلة من الزمن ...
و التقابل ضروري بين الطرفين .
الموضوع واحد و إطار واحد (بيصير حب أو لأ عبر الانترنت)... و نحنا بدنا نسمع اختلاف الآراء !
إذا أعجبت ببنت من طريقة كتابتها و أجوبتها و نقاشها للمواضيع ، فهل يمكن تحبها ؟
أو ممكن تخبرني ايمتى بتعرض على بنت إنكم تتقابلو ، على أنو أساس و هي لح تسألك ليش أكيييييييد ؟!!!

هات عطينا رأيك و خبرتك نبيل أفندي ,
تقبل ردّي ,
أبو أسامة ,

شكرا نبيل لردك الجميل ,
أنا معك إنو العلاقة ما بتنشأ بين يوم و ليلة بدها مرحلة من الزمن ...
و التقابل ضروري بين الطرفين .
الموضوع واحد و إطار واحد (بيصير حب أو لأ عبر الانترنت)... و نحنا بدنا نسمع اختلاف الآراء !
إذا أعجبت ببنت من طريقة كتابتها و أجوبتها و نقاشها للمواضيع ، فهل يمكن تحبها ؟
أو ممكن تخبرني ايمتى بتعرض على بنت إنكم تتقابلو ، على أنو أساس و هي لح تسألك ليش أكيييييييد ؟!!!

هات عطينا رأيك و خبرتك نبيل أفندي ,
تقبل ردّي ,
أبو أسامة ,[/quote]

على راسي ابو اسامة
هلق ردي يمكن ما يعجبك بس انا هيك بفكر
يا سيدي اي ممكن اعجب ببنت من طريقة كتابتا وردا
ليش لا ممكن تعجب باي بنت بهي الطريقة وانت اكيد بعدك مو شايفا ولا سامع صوتا
ولا تقلي ما صارت معك ولا مرة لانو هي بالنهاية مشاعر وبدا تتحرك
بس لاحظ انو انا كررت كلمة اعجاب
والاعجاب مو حب مع انو مرحلة بداية اذا بدك
اما الحب فا انا مستحيل صدق انو بيصير عالنت

لانو من اساسيات العلاقة الناجحة انو يكون بيعرف كل شي عن الشريك
وعاللنت مو ممكن تتوفر هي الشروط كلها
لهيك منكون عم نضحك على حالنا
هلق ممكن ينصاب اي واحد منا بشعور تجاه بنت عالنت مو شايفا ولا حاكي معا
وبيصير متعلق فيها وما في يفارقا ويتعودو على بعض بشكل كبير
ومنفكر هالموضوع انو حب
بس هو مو حب لانو اذا بعدين شفتا وما عجبك كلاما او لبسا او طريقت تعاملا
رح تبعد عنا والي بيحب مو معقول يبعد هيك او مشان هالاسباب

بظن انو لازم تكون فهمتني
مشكور ابو اسامة موضوع موزون

زائر

هلأ انا ما كتير بامن بالحب عبر الانترنت
لانو منوين لوين حبو بعض
وهنن يادوب بسلمو على بعض
وبيتناقشو وكل واحد بيقول رايو
واذا حس بالحب تجاه هل الشخص يلي هو ما بيعرف عنو شي غير انو حاكا معو عبر هل الشاشة
فهاد اسمو يا اعجاب يااما لقا مين يطمن لو
اما الحب فهووهم بالنسبة لهاد الشخص
ممكن يكونو اصدقاء بعدين اذا نجحت العلاقة وتجوزو
اذا سالو العالم منين عرفتو بعض والله عرفنا بعض عن طريق الانترنيت
وهاد الشي مو منيح بسمعة البنت قدام المجتمع لانو مجتمعنا مابيتفهم هالشي
وقدام جوزا بعد عشرة طويلة كمان انو هنن عرفو بعض وتجوزو عن طريق الانترنيت
معقول يربو ولادن على هل الشي
وبركي ماعجبو طريقت لبسا او تربايتا بعد ما ضل فترة منيحة عم يحكو عالانترنيت

مشكور ابو اسامة عنجد موضوع كتير حلو وبيستاهل النقاش
وبتمنى انو كون وصلت الفكرة
وتتقبل راي

انا ما عم امنعو من شي ابو اسامة
بس المشكلة انو بتكون قناعاتو غير قناعاتي وبهل الحالة لازم يسالني على القليلة
شو رايي بالحب عن طريق النت
وبدك تعرف اذا حدا طلب يشوفني بعد ما كون حاكية معو و مقتنعة بشخصيتو
ومرتاحة الو ومعجبة في فأكيد جوابي لح يكون اي بس مو معناها الموافقة على اني حبو
لا هي بداية الطريق لاني اعرفو اكتر وممكن ما نتفاهم مع بعض بس نشوف بعض
مشكور مرة تانية ابواسامة الموضوع رائع

شكرا يا سيد وسام على تعليقك و إبداء رأيك بالموضوع ,
من ناحية ثانية أنا بترك الحرية شوي للشباب و الصبايا بالنقاش بعدين بشوف !!!

وهلق منجي لتعليقك : أنا بخالفك برأيك !
من ناحية يلي عم يضحك على حالو ، لأن بعرف حالات انتهت بالزواج !! مو كل الناس بتتسلى .
من ناحية ثانية ، شو الواقع يلي عم تحكي عنو ! عم اسمع أخبار بتشيب عن الواقع يلي صاير بسوريا ...
مثل ما قلت العلاقة و المشاوير و المواعيد بتساعد على الحب ... لكن ليش فاشل ؟! بالعكس بلاقيها إذا وصلت لهي المرحلة بتصير أريح للشخصين يعرفو بعضهم أكثر . (على اختلاف العادات و التقاليد و كل شخص بطريقتو دينية أو عرفية ، مع أهل أو أصدقاء .... إلخ )

وشكرا مرة ثانية ،
تقبل مني أبو أسامة ,

والله يا ابو اسامه انت يمكن ما بتعرف شو الانترنيت بالنسبة الي

انا الانترنيت فيك تقول نوعا ما ادمان ممكن لانو بسافر كتير ولانو شغلي عن طريق الانترنيت
بالوقت الحالي اكتر من الواقع
والتواصل مع كتير ناس عن طريقو ومنهم اصدقاء واصحاب عمل

وبالرغم من هالشي ما متوقع اني حب عن طريق الانترنيت ممكن لانو حتى بالواقع رافض الفكرة
لانو بأمن بالحب يلي بييجي بعد الزواج والحمد لله ما علقنا بما اسميه مصيبة الحب هههه
بس ان كان الحب بدو ييجي عن طريق الانترنيت انت معترض معي بفكرة انو فاشل؟؟
انا هيك كان راي لانو ما شفت حدا حب عن طريق النت ؟؟ وتزوج؟؟ بس انا ما عندي تجارب او مرت علي من هيك نوع
بس عم اتفرج على اراء الشباب وممكن هالشي يكون ما عم نعرف كيف الناس بفكرو؟؟ وحاليا عم اقراء اراء الشباب
وعم نشووف
ممكن انا ما مقتنع بالفكرة لانو حتى بالواقع رافض الفكرة

مشكور ابو اسامة مرة تانية الله يعطيك العافية

بتشكر نبيلو على توضيحو للفكرة تبعو ...
الإعجاب مرحلة من مراحل الحب الأولى .

و بشكر مايلي لأن عندها نظرة مستقبلية حلوة ، و بما إنك جبتي هالفكرة تبع تعرفو على بعض وبعدين تزوجوا شو بدهن يقولو لأولادهم .
من ناحيتي بعرف شخصين ارتبطو بهي الطريقة بس لسا أولادهم صغار ، ما بعرف شو بدهم يقولوهم بعدين !!!
ولكن مثل ما ذكرت سابقا إنو الوضع عم يتغير كان في رسائل و بعدين تلفون وبعدو موبايل و هلق نت ... وفي مواقع و منتديات حاليا للحب و التعارف من أجل الزواج و صار شي عادي بتعملي اشتراك و بتحطي مواصفات الشخص يلي بدك ياه !!
و كذلك بالنسبة للشب بحط مواصفات البنت يلي بدو ياها و عم تنجح هيك طريقة بالغرب و الشرق الأقصى ...!
فلا تهكلي هم الدنيا عم تتغير بكرة الأولاد بيطلع معهن شي جديد و يمكن يقولو لولادهم روحو فتحو نت دوروا على شريك حياتكم !!! ههههههههههه
وبركي ماعجبو طريقت لبسا او تربايتا بعد ما ضل فترة منيحة عم يحكو عالانترنيت
إن المحب لمن يحب مطيعو ، هذا جوابي !

ممكن إسألك مايلي نفس السؤال : إذا تعرفتي على شخص عن طريق النت فهل ممكن تطلبي تشوفيه ؟
و إذا هو طلب يشوفك بس مشان تشوفو بعض بتوافقي ؟؟؟؟!

وشكرا لمساهمتك بالموضوع ,
أبو أسامة,

زائر

هلا اذا رفقات خلينا عن طريق النت
مشان ما تنهز صورتي قدامو يلي راسملي ياها بمخيلتو
او تنهز صورتو قدامي وننصدم نحنا التنين
خلينا رفقات و نحكي مع بعض ونفضفض لبعض
مو الشوفة اهم شي الارتياح بنظري اهم
واذا تطورت علاقتي باحد الاشخاص هون يمكن معك حق مالازم تتطور قبل ماشوفو واتعرف علي

مشكور كتير ابو اسامة موضوعك رائع وسؤالك اروع

شكرا miley مرة ثانية ,
وكلامك في شيء منطقي و معقول ...
كتير حلو إذا بتلاقي مين يسمعلك و تفضفضيلو و تحكيلو ويسمعلك ويساعدك كمان .

مابعرف
موضوع متشعب
واذا بدي احكي عنو
مافيني
الحب
معايرو اختلفت كتير من جيل لجيل ومن واقع لواقع
الحياة معو مو حلوة وبدونو مرة
عطيني حل مافي طبعا
مشان هيك انا اخر حدا بيحكي بهل موضوع
بس العنوان اثار فضولي مشكور

نورتي لوليتي بمرورك ,

مثل ما قلتي هي أزبط كلمة عن الحب: (الحياة معو مو حلوة وبدونو مرة)

نحنا نقاشنا إنو بتعجبي بحدا عن طريق النت و هل ممكن توصل لمرحلة إنك تحبيه للشخص
وصلنا مع الشباب والصبايا إنو بدون ما يشوفوا بعض ما بيصير الحب (طبعا ما عم نحكي عن الناس يلي بتتسلى!)
طبعا في اعجاب و طريقة تعبير و بتصل لمرحلة التعلق بالشخص الثاني ، بس هل ممكن تحبيه ؟!!
أو مثلا حدا يطلب من الثاني إنو يلتقو بمكان !
وبعتقد بنظري شيء عادي إذا حبو يكملو أو يتقدمو بالعلاقة إنو يكون في لقاء مشان يشوفو بعض !!!

ممممممممممم
بصراحة
النت حلو ومو حلو
حلو انو تتعرف على اصحاب
وناس مختلفة
بس الحب
ممممممممممممم
مابظن
صعب
صدقني صعب كتير
اد ما كان صادق بتحس انو في شي ناقص
اغلب العلاقات يلي بلشت عل نت فشلت
حب ونت انسى
صداقة ممكن
بس حب
لالالالالالالالالالالالالالالا
صدقني مو من فراغ عم احكي
مشكور

والله يا ابة اسامة كلامك منطقي وشيت انو واحد يحب واحد عن طريق النت فيها وجهة نظر
وفي ردود من الاخوة كمان منطقية بس انا برأي وكل مين له رأيو انو مافيها شي بس انا بحسها فيها نوع من الخيال

انا برايي انو النت للصداقة وبس بس الحب مستحيل مشكور ع الموضوع الحلو

أهلا نورت بليدنغ ، حلو الواحد يكون بين بين ،
و شايف عاجبتك الفكرة ، هات خبرنا صاير معك شي مغامرات خلال النت ...!؟

شكر مايا على مشاركتك الحلوة مثلك :
و طالما فكرتك عن الصداقة وبس ، بعتقد إنك بتحسني تكوني صداقات من المجتمع كمان مو بس من النت ...
لكن ما بتعتقدي إنو تتطور صداقة مع حدا و يصير في حب بيناتكم ، أو مثلا بتحبي تشوفي و تتقابلي معو .؟؟؟

موضوع حلو للنقاش
انا برايي في حب عالنت بس طبعا مو من ورا شاشة
لازم يتقابلو الطرفين وهاد شي كتير ضروري والا مامنسمي هالشي حب ممكن اعجاب بالافكار
لانو النت عالم افتراضي وفي كذب كتير
والتقابل الشخصي ممكن يغير كتير شغلات

بس للصراحة انا شايفة انو هالعلاقة فاشلة ونادرا ماتزبط

مشكور ابو اسامة على طرحك الموضوع
الله يعطيك العافية
تقبل رايي

شكرا رمروم على مشاركتك بالموضوع ،

وأنا معك بالفكرة يلي طرحتيها إن التقابل الشخصي ممكن يغير كتير شغلات ويبعدنا عن التلاعب و الكذب ، وإنو يلي بيصير عن طريق النت أو الشاشة هو عبارة عن ارتباط و توافق أفكار ، ممكن كتير إنو الواقع يغيرها .
بس ما منحسن نقول فاشلة لإن فعليا في قصص كتير عم تصير و علاقات عم تنجح ، والدليل كثرة المواقع تبع الاربتاط و الزواج مثل ما بتشوفي من دعايات بكل المواقع .

نورتي الموضوع ,

هو كفكرة كلو بس عند التوجه الى ارض الواقع فنجده ليس له وجود ابدا
لان الحب على ارض الواقع يمتميز بطعم خاص تتعرف على شخصية الذي امامك تدرسه جميع جوانبها تستبعد مايكره قد المستطاع في جمال الحب بلتضحية التي تقدم من احد او كلا الطرفين

موووضووع منطقي وحلوو

انااا رأيي الخااص انووووووو الحب انوواع ...

يعني اناا ممكن حب انسان عن تريئ نت او اي وسيلة بيجووز عن تريئ مكالمة تلفون عن غلت

يصير في علائة حب

ومو بدرورة الحب عن تريئ نت يكوون فااشل مو شرت

في كتيرر علائاات حب صاارت على اررض الوواقع وماانجحت

مشكور على المووضوع المفيد.....

انا برأيي حب انسان لا تعرفه الا عن طريق النت
هاد يعتبر برأيي مجرد وهم
والانسان طبعا لازم بعرف اسلوب الطرف الاخر عن طريق
المحاورة
الحركات
التصرفات السلبية او الاجابية
وهي الاشياء ما بتبين من شاشة الكمبيوتر
لازم الشخص يلي بحب يحب عن طريق الواقع والا برأيي هوة حلم او خيال بعيشو لفترة محددة من الزمن ولا بد من انها تفشل على المدى القريب لانو الشخصين يلي عم بيتحاوروا هنن مجرد وهم
بغض النظر اذا صار بعد الانترنت لقائات بيناتهون هاد شي رح يختلف عن كلشي ذكرتوا بالسابق
مشكور ابو اسامة ع الموضوع الجريئ والمميز

هلا انا برأي انو الحب عبر الانترنيت هو حقيقة لانو الطرفين اولا مالح يكتفو بالتحدث بس
اكيييد لح يكون في مكالمات ومقابلات
واذا كان هو بعيد ومابيقدروا يشوفوا بعض
فبراي لح تكون علاقة فاشلة لانو غلط من الاول وكل مابني على غلط فهو غلط ولح يفشل
واكيييد هاد لح يكون وهم وتخيل لانو الانسان على شاشة الكومبيوتر غير ع الحقيقة تمام
ما بتقدر تقارن فيهن
وممكن تكون علاقة ناجحة ممكن هاد بالصدفة فقط بيصير
هلا بالعلاقات العادية مثلا في كتيييير علاقات حب واغلبهم انتهتو بالفشل للاسف يعني
انا بقول النت للصداقة وبس وصداقة طبعا ما تتجاوز الحدود طبعا بين البنت والشب
يعني مو شرط اذا كان صديق انو يحكي عالتلفون معها او يطلع معها مشاوير
شكرا كتيير ابو اسامة عالموضوع الحلو هو بصراحة بيستحق المناقشة
مشكوووووور وتقبل مروري

الحب عبر الانترنيت
بيجوز يحكو مع بعض يرتاحو لبعض
يتعودوا كل يوم يحكوا
بعدين يصيروا يحكوا عالموبايل
وبعدين لحتى يشوفوا بعض بيجوز ما يتقبلو بعض وقت تشوفه ويشوفها
بيجوز يتقبلوا بعض
في قصص ممكن تنجح في قصص ممكن لاء
وبرأيي وقت يشوفوا بعض يمكن يعرفوا بعض أكتر
ويتعرف عليها وتتعرف علي أكتر
اذا وصلت الشغلة أنون يشوفوا بعض ويعرفو بعض بيجوز تنجح
اما اذا ضلو مستمرين عالنت فقط فهاد كلو تسلاية يمكن
أو لحتى يطلعوا المشاعر المكبوتة يلي جواتون
مشان هيك بحبو عالنت
في ناس مناح وفي ناس مو مناح
ونيالون يلي بيكونوا صادقين وبتزبط علاقتون وبيتجوزا
بس برأيي البنت لازم ماتعرض حالها لهيك مواقف
ويلي كاتبو الله بيصير [b]

بصراحة حب عن طريق نت ممكن اذا كانو بيعرفو بعض وعندهم ثقة ببعض بس بظن انو نت هو مشان الاصدقاء يعني حب عن طريق نت بحسها ثقيلة اذا هالانسان ما حب على واقع ليش لحتى يحب على نت مابعرف بعدين اذا كان بيعرف هادا شخص و حكو مع بعضهم على نت فهاد شي حلو برايي وبيعرفو على بعض اكتر .

وهم

أنا مع انو الحب عالنت خياال بخيااال
بس بصراحة وما بخفيكن
أنو فعلا موجود لأني شفتو قدامي بأكتر من حالة
والحمد لله انتهو بزواج
مع اني كنت شاكة بوصولن لهالتيجة مية بالمية
بس بالنهاية لقيت الصدق يلي انوجد بالطرفين ادى لهلنتيجة
تقبلو مروري

ما شاء الله عنكم ، أفكاركم و تحليلاتكم كتير منطقية و معقولة
و كل واحد إلو وجهة نظر معينة ، ناس بتوافق و ناس بترفض و ناس بتصلها الإجابة من التعليقات .

روبي رو
clara
عبد الرحمن
صدى روحي ...

بتشكركم كتير على مروركم .

» الإنسان قبل (الحب) وبعد (الحب) وعند (الحب) ...
» حقيقه ستار اكادمي
» اشبك اصابعك وشوف حقيقه علميه