حكايات شامية

دهليز كت كتان

كان بزمان كت كتان، آعد بصدر الدكان عما يدق فلفل وارنفل وحب الهال اجت (أتت) لعنده عجوز تسعينية . قالتلو : لسّاك (الا تزال) آعد (قاعد) بها المكان (بهذا) ياكت كتان؟
آلها: شو بتريدي؟
قالتلو : بتروح عالبزورية، بتاخذ صرة بألف ومية ، بتروح لسوء الحميدية بتلبس بدلة رسمية ، بتروح لارنة الفلانية، بتلائي أول حارة مطروشة والثانية مرشوشة، والثالثة بالسجاد مفروشة ، بتدء الحلئة بترنّ الورئة بتطلع لك جارية محندئة مبندئة من سبع رجال مطلئة. بتئول لها: هو (هنا) ستي عيشة عاشيء (عاشق) بهواها. بتئولك: تفضل.
آل لها: ايه متل ما بتريدي.
راح هالزلمة، عالبزورية أخد صرة بالف وميّة ، راح لسوء الحميدية لبس بدلة رسمية راح لارنة الفلانية ، لئا اول حارة مطروشة ، والثانية مرشوشة، والثالثة بالسجاد مفروشة، دء الحلئة، رنّت الورئة طلعت لوجارية محندئة مبندئة من سبع رجال مطلئة .
ال لها: هون ستي عيشة عاشيء بهواها، آلت لو تفضل.
فات هادا على هالبيت لئا صبيّة لبية ، بتئول للأمر (القمر) غيب لاعئد مطرحك آضي ومفتي ونئيب . عم تتمايل عنقود وخصلة والبائي فراطة. اخدت هالصرة من ايدو، وهالبردوسين (المانطو) من على كتافو، ولائت له ملائات الاحباب اذا كانوا غيّاب. فوتته عالئاعة حطته ساعة زمان ، غيبته عن الاوطان، دئت (عزفت) عالعود حنّت عالعود كما تحنّ الوالدة عالمولود، اعدت هيه وياه، حكو ضحكو لعبو، سبحان رب يعلم بيناتن آلتلو نعست ، حطلها ركبتو تحت راسها لحتى تنام ، نامت هيه ، .. شوي وجعتو ركبتو، زحل ركبتو وحطلها لحاشة (وسادة) تحت راسها، وفز (نهض) عمّا يمشي بها البيت، ييه !! تطلع لئا حلئة ، رفع الحلئة ، لئا درج، نزل بها الدرج، لئا دار ودواّر والسعد فيها دار ، وفيها طيور تناغي اشكال وألوان، وفيها فاكهة من غير أوان .
قال: تبارك الخلّاء (الخلاق) قادر مقتدر على كل شيء .
قال لحالو : والله لأئطف (لأقطف) لي شي تفاحة وآكلها.
إجا ليمدّ ايدو عالتفاحة .. آلتلو: ياخلئت (ياخلقة) ربي، ما بتمدّ ايدك على شي أبل (قبل) ماتئول ائوالو (تقول اقواله):
آل لها : إيه متل ما بتريدي .

آل للتفاح :
يسعد صباحك ياتفاح ملّيسي ............. يلي أطفتك من الربوة على كيسي
وان أدّر الله وان جلست مجاليسي .......... لكتب كتابك وادفع النئد من كيسي

دشّر (ترك) التفاح و إجا للاجاص وآللو:
آجاص ما ناكل حامض يغشينا ............ غريب ما ناخد، يسافر ويخلينا
وان اخدنا وللبدّ مناخد من اهالينا ......... لحتى اذا زعلنا يجو أهلو تراضينا

راح للمشمش وآللو :
مشمش مشامش تمشينا لحارتكن ......... عيوني تئطر دم طوال غيبتكن
وان اجا المبشر يبشروني بسلامتكن ......... لاعطيه روحي العزيزة وفرّء (وزع) من هديتكن

إجا لليمون آللو:
ليمون، ليمون وانت احلى من الليمون ........ محبتكن بئلبي كما الجوهر المكنون
وان كنت بولّف بدالكن عال لماّ دون ........ بيكون خصمي النبي الجوّات الحرم مدفون

اجا للدالية العنب وقال :
ياريتني دالية وعرّش على باب دارك .......... واحمل عنب حلواني وكله علي شانك
وحياة عيونك السود وشوارب خالك .......... لما تروح عالغربةاجي على بالك؟

مشكوووووووووور موضوع حلو

مشكووورين ع المرور نورتو

عنجد حلوين قصص ايام زمان
كانوا يحكو ع القافية
وكلام موزون تحسو شعر

مشكور
تقبل مروري

زكرتني بحكايات جدتي لله يرحمها
مشكور طارق كتير حلوة

حلوووو كتيييييييير مشكورياطارق تقبل مروري عنجد ذكرتنا بايام زماااااااان

الله يرحمك يا ستي شو كنت تحكيلي من هالحكايا ,,,
بس بعرف قصة عن ( كت كتان ) غير يلي حكيتها !!! بتعرفها شي ؟!

شكرا كتيير يا طارق
كترلنا منهم ,,,,

مشكووووورين جميعا ع المرور
نورتو الموضوع