نقاش جاد ... الحب والدبن ...عطينا رايك ؟؟!!!

ـآلشعورُ بآلحُبً

ألحبٌ أروعِ منُ آلوآقعِ ..

وهيٌ أروعِ كلمهً ينطقُ بهآ آللسآنِ للاًعترآفً بمشآعرهً نحوً آلاخرُ ..

وبعدهآ ..

يقومِ ببطولتهِ رجلُ وأمرآهً ..

يتقآسمآنِ آلاحلامً .. وألخيآلُ ..

ألفرحً .. وآلحزنً ..

يبحرآنِ إلىً آلمجهولًُ ..

إلىً مكآنِ لاً يعرفهً آلأً آلقدرً ..

وقدِ تكونً نهآيهً هذهُ آلحبُ

جميلهً .. مثلِ آلربيعً ..

وقدً تكونِ مآسآةً ..!!

كيفكون شباب وصبايا
هلق هون بدي اخد رأيكون بموضوع كتار منا بيعتبرو حساس
وهو الحب والارتباط من غير دين

وطبعا متل ما الكل بيعرف انو في كتير طوائف ما بتفضل يصير ارتباط بين اي شخص من طائفتها مع شخص من طائفة تانية
لعدة اسباب
ومنها الحفاظ على وحدة الطائفة
يعني يا جماعة
هلق اذا تجوز من برات الطائفة
بتخرب الطائفة
بس هيك بيكون التفكير
يعني ما بيفكرو انو ممكن يزيد من وحدة الطائفة نفسها
او وحدتها مع طوائف تانية
ومع احترامي لجميع الطوائف والمعتقدات
شو الفرق اذا الكل عم يعبد الله
مهو ما في غير رب واحد والكل عم يعبدو وهو الي خلق كل البشر وما فرق بينون
لك وحتى المصيبة الاكبر انو احيانا حتى من نفس الدين
بيكونو الطائفتين الهون نفس الكتاب والشريعة والمراجع
ولك حتى النبي وتقريبا الكل بيعبدو الله بنفس الطريقة بس كل واحد عامل لحالو اسم
يعني هلق بالله
شو الفرق بين
السني والشيعي او الدرزي او العلوي او الاسماعيلي
مو كلون بيقروا نفس الكتاب (القران) وبيعبدو رب واحد وتقريبا الكل بيأمنو بنفس النبي

هلق يعني اذا مثلا
بنت درزية حبت شب سني وهو حبها
ليش بيكون الارتباط مستحيل بيناتون
او شب شيعي وبنت علوية
ليششششششششششششششششششششش ممنوع

برجع بكرر بتمنى تجاوبوني بصراحة كبيرة
لانو الكل بيعرف انو بهيك مواضيع ما فيها لعب
مع احترامي لجميع الديانات والمذاهب
.
.
.
.

اول شي نحنا لازم نحترم العقيدة والمذهب.........................الشعب الشرقي هيك يا أخي من الاول لا تفكر إنو ترتبط بحدا من غير مذهبك
بصراحة و إنت يلي طلبتها ..............الموضوع معاهون حق لانو بكرة يعني بعد الزواج في أمور هامة يجب مراعاتها على سبيل المثال الولد اللي بدهون يجيبوه شو وضعوا مين بدو يحب من أي مذهب بكرة كلما صارت شغلة إنت من ........
وأنت من.........بعدين كل معتقد عندو عادات و تقاليد و أمور مو كل واحد بيتحملها أو ممكن يساويها أنا بدعوك تقرا كتير عن هي المذاهب اللي ذكرتها وغيرون وغيراتهون بعدين تتطرق لهيك موضوع أنا برأي كبير حتى أكبر من إنو يناقشوا ناس متلنا جاهلين بهيك شغلات ....................................بس سؤال أخير أنت سألت هاد السؤال لواحد أكبر منك بالعيلة؟ وإذا سألت شو جاوبك؟.................................................................................... مع أحترامي إلك بس الموضوع مو بمحلو أبداً
تقبل مروري ولا تواخذني إذا تقلت عليك................

زائر

موصوع حلو كتير

من ناحية انو يمنعو الارتباط بس لانو من غير عشيرة انا بعتبر تخلف
بس بتجي ناحية الدين يمكن يصير مشاكل كتير
لانو ما ختلفنا انو نفس الدين ونفس النبي وكلشي بس في شي اسمو عادات في شي اسمو تقاليد وكلو بيختلف عن بعضو
وهادا السبب يلي بيسوي المشاكل
لانو الاولاد شو بدهم يطلعو يعني

يلي بيطلع عن ملتو بموت بعلتو

موضوع: الحب جميل الإثنين يناير 04, 2010 7:02 pm

ولكن اتفق انه علينا احترام اختلاف الدين وهذا شي كل واحد حر في بس لافرق بين اي شخص فحب هو حب

انا برأي الواحد يحب وينبسط ويعل يلي بدو ياه
بس لما لازم يتزوج يخليها على الاهل والاختيار علي

موضوع: لاتصدق الحب الثلاثاء يناير 05, 2010 6:46 am

موضوعك كتير رائع و هام بنفس الوقت ، بس مالح ناقشك فيه حاليا//
عندي تعقيب بسيط على النص يلي جايبو (ـآلشعورُ بآلحُبً)
شو يعني ألحبٌ أروعِ منُ آلوآقعِ .. ما نحنا عايشين بالواقع !!!
و مين قال إنو كلمة بحبك أحسن شي لتعرف عن الحب ؟!!!! يمكن مرة وحدة بحياتي قلتها مجاملة!!
وبعدين إذا ارتبطو اثنين / فالارتباط على الحلو و على المر ( يسترجي حدا يعترض) هذا أساس الارتباط..بكل الأديان.

رأي بسؤالك: أنا ماعندي أي مشكلة بأي نوع من الارتباط ، بس لازم الطرفين يقدمو تنازلات كتيييير .!!!!!!! لحتى يكملو مع بعض.

هلق اخي اليتيم
اول شي انا قاري كتير منيح عن باقي المذاهب وبعرف شو عبحكي كتير منيح
تاني شي ليش الموضوع اكبر من انو نتناقش فيه شو يعني عيب ولا حرام بعدين انت عمرك 19 سنة يعني مانك صغير واذا مفكر حالك صغير هي مشكلتك
بعدين انا شو بدي بالي اكبر مني بالعيلة لاسالو شو انا الي بدي ارتبط ولا هو
يسلمو لمرورك وبحترم رايك

باد بوي رايك حلو ومعك حق انو بتختلف العادات بس لايمتى بدنا نضل مقيدين بالعادات بيكفي
يسلمو لمرورك نورتنا

برشلوني
ولكن اتفق انه علينا احترام اختلاف الدين وهذا شي كل واحد حر في بس لافرق بين اي شخص فحب هو حب

هاد الحكي الصح تشكر يا حب
عبد
اااااااااااااااااخ منك يا عبد
يسلمو

ابو اسامة
النص الي منزلو
استعرنا من موضوع عنا هون بالمنتدى كاتبو ياني
عجبني ونزلتو واذا بدك تناقش فيه ناقش ياني
بس رايك والله على عيني وراسي
وانا بعمل متلك هيك وضروري الطرفين يقدمو تنازلالالالالات

يسلمو على مروركون نورتونا

نقاش جاد ... الحب والدبن ...عطينا رايك ؟؟!!! 555-Bye

نقاش جاد ... الحب والدبن ...عطينا رايك ؟؟!!! 555-Bye

مشكور نبيل على الموضوع الحلو أنا من جهتي ما رح أشرحلك كتير عن الموضوع
لأنو في أمور ما لازم تنحكى لأنها ممكن ادايئ بعض المزاهب و الأديان

أنا برأيي أثمن ما يملكه الانسان هو الدين و الدليل أنو اي شخص ما بيتخلى
عن دينو مقابل أي شي ممكن
تسمع عن بعض الحالات لتغير الدين أو التخلي عن الدين و لكن حالات قليلة و المتخلي عن دينو غالبا بكون ما
عندو علم بكل نواحي الديانة الخاصة فيه
أو الاطلاع على الأديان الأخرى و أقتناعو بأن دينه ليس صحيح كفاية و الدين الذي
اطلع عليه هو الأصح

منرجع لموضوع الزواج
العادات و التقاليد ألها سيطرة بس الدين له السيطرة الاكبر
بالنسبة للاسلام
يأمر
يجوز للمسلم الزواج بأي من أهل الكتب
يعني اليهود و المسيح و الاسلام و أصحاب كتاب الزبزر
ولا يجوز للمسلمة الزواج الا بمسلم

هاد بالنسبة للاسلام أما الديانات التانية ما بعرف أما الدين بيؤمرهن بهالشي
أو هي ردة فعل قديمة على الدين الاسلامي و على الاغلب هي أصل للديانات
لأن اليهود من الديانات القديمة و لا يسمحون بالزواج من غير دينهم

اذن الموضوع اساسو ديني و ما حدا يعارض الدين
لا هو تخلف لا مخصص بالمجتمع الشرقي بل بالعالم كله الا من تخلى عن الدين

وبالنسبة لأبو أسامة ما بئدر جاوبك لحتى اتجرب الحب عزيزي

مشكور كتير نبيل

شكرا لاهتمامك yany
حتى كون صريح معك ، مجرب الحب كتيير ، بس الأحلى أنك تحب أكثر من وحدة بنفس الوقت !!
جرب ما بتخصر شي . بالعكس بزيد درجة الحب عندك و بالتالي بتنعكس على الطرف الثالي و بيصير بحبك أكثر!!
إسأل مجرب و لا تسأل حكيم.
أخوك أبو أسامة المحب.

يسلمو اسامة والله مشاركتك رفعت من قيمة الموضوع واغنتو

ابو اسامة
هههههههههههههههههههههههههههههههههههههه
بس الاحلى انك تحب اكتر من وحدة بوقت واحد
هههههههههههههههههههههههههههههه
لك ليش عم نلاقي وحدة نحبا لنحب غيرهااااااااا
هههههههههههههه
والله باينتك مجرب وحكيم

يسلمو ابو اسامة نورت

نقاش جاد ... الحب والدبن ...عطينا رايك ؟؟!!! Be6cb530dc

نقاش جاد ... الحب والدبن ...عطينا رايك ؟؟!!! Be6cb530dc

يعطيكم العافية شباب
موضوع حلو و جريئ
وهي مشاركتي الأولي معكون وبتمنى تقبلوني صديق
أما بالنسبة لردي على الموضوع :
لازم تعرف يا حبيبي أنو رباط الزواج ما هو رباط شب ببنت قطعاً هاد غلط وغلط كبير جدا وكل مين بنظر إلى الزواج بهي الطريقة بكون إنسان ما عندو بعد نظر
والسبب أنو بالزواج بتتصاهر عائلتين وبتنشأ علاقات أسرية جديدة ما كانت موجودة قبل الزواج
كذلك بعد إنجاب الأولاد رح يصير ألهم أقرباء مشتركين من أهل الأب و أهل الأم متل الأخوال و الأعمام
وبالتالي لازم ننظر إلى الزواج من منظار صحيح ودقيق
أما بالنسبة للدين ( بغض النظر إن كان إسلامي أو غره ) فهو بمثل المنظم الأساس للزواج و الرقيب عليه و أي إهمال أو إغفال لهالدور رح يترتب عليه خلل كبير جداً متل ما صار بالدول الغربية و بعض الشرققة تكاد الأسرة فيها تختفي و نسبة العجائز في المجتمع وصلت لمعدلات خطيرة جداً
فالنتيجة من هالحكي أنو لا بد من مراعاة الدين في أي ارتباط و أي إهمال له فالنتئج تكون غير مرضية أبداً
وتقبلوا خالص شكري
دمشقي

يسلمو ايديك دمشقي
نورت المنتدى ونورتني
هاد رايك وانا بحترم رايك
يسلمو ايديك عالمرور

نقاش جاد ... الحب والدبن ...عطينا رايك ؟؟!!! 545-waiting

السني والشيعي او الدرزي او العلوي او الاسماعيلي او اليزيدي
اول شي بدي نبهك لشغلة نبيل ذكرت بموضوعك اليزيدي "اليزيديين هنن طائفة عبدة الشيطان" ممكن انت مخربط بالاسم لشي طائفة تانية أكيد مو أصدك هدول صح ؟؟
وتاني شي موضوع اختلاف الطوائف غالبا ما بيفرق عند الأشخاص اللي بيكون دينهم قليل يعني ما لح يحسو بالاختلاف الا بشكل نادر أما الملتزمين بالدين ما لح يقدرو يتحملو الختلاف لأن حيلاحظوه بشكل يومي وحيكون صعب عليهم التأقلم وبالنهاية هاد زواج مو لعبة وحياة تانية لازم يكون الطرفين مرتاحين ومتفقين "يكونو متفقين بالدين كتير شي مهم"
واخر شي بصراحة ماعجبني رأي أبو اسامة أبدا انك تحب اكتر من وحدة بنفس الوقت" ورأي لورد"اتسلى وبعدين بتتزوج على كيفك" هدول مشاكل كبيرة "الله يعين البنات عليكم "
أسفة عالاطالة

اسمحو لي اني حط رأي
بالنسبه للحب بين الاديان المختلفه
فهو مصيبه اذا حدث
لانو من اهم شروط نجاح الحياة الزوجية انو يكون في تفاهم
واذا كان الخلاف موجود بغذاء الروح يلي هو الدين
بحياتها بقية الامور ما لح تظبط
وبرأي قد يبدأ الزواج بالحب ولكنه سوف يفشل بسرعه

مشكورين اماني ووسام عالمرور

نورتو وبحترم رايكون

زائر

ولله موضوع جريئ وحلو وشكرا نبيل على طرحو
هلأ وبصراحة أختلاف بلأديان بلنسبة للزواج شي بعيقو وكتير
يعني حيختلفو بكتير أشياء
ألا أول شي أزا ماكانو متزمتين وهاد شي منيح برأيي
وتاني شي أزا حكو مع بعض بكل القصص يلي رح تواجهن بلمستقبل وكانو كتير واقعيين
بهي الحالة ممكن بزبط زواجهن
تقبل مروري وشكرا كتير

بس شو مشانك سيد أبو أسامة حب أكتر من وحدة صار أسمها خيانة فوين الحكمة بلموضوع

الله يسلم ايديك نبيل الموضوع حلو وجريئ والكل بيتجنب الحكي في بس انا برأي انو الحب لحالو مابيكفي
ليكون وسيلة للارتباط وخصوصي اذا كانت المذاهب والطوائف مختلفة
او حتى اذا كانت وحدة الا ماتختلف شوية امور لان

.....كتير شغلات بتوقف بالطريق اولها العادات والتقاليد
ومارح احكي اكتروحكي اسامة صح انو في امور مالازم تنحكى حتى ما تتدايئ المذاهب والأديان نقاش جاد ... الحب والدبن ...عطينا رايك ؟؟!!! Icon_flower

بس هاد رأي وبتمنى تتقبل مروري

مشششكور

ههههههههههههه

عبورة مشكورة عالمرور وطولي بالك على ابو اسامة
هههههههه

ستروبري نورتي الموضوع مشكورة عالرد الحلو
وبحترم رايك

مشكورين صبايا عالمرور الكلاس

نقاش جاد ... الحب والدبن ...عطينا رايك ؟؟!!! 13

نقاش جاد ... الحب والدبن ...عطينا رايك ؟؟!!! 13

إلى الأماني : أولا أنا بوافقك الرأي عن الأشخاص يلي دينهم قليل أو مو ملتزمين بدينهم تمام !!
ثانيا، إذا ما عجبك رأيي عن الحب لأكثر من وحدة ، فجاوبيني على هلسؤال: يلي بيتزوج أكثر من وحدة ما بيكون حابب كل زوجاته؟!!! وشرطك كلهم بنفس الوقت!!!

والله يا ست عبورة : إذا بيحكو بكل المشاكل يلي حتواجهم ، لا بد منها بسبب إختلاف الملة على اختلاف نوعها لأن في أمور متناقضة . إلا إذا مثل ما حكت الأماني ، مالو علاقة بالدين !!!
بعدين وين الخيانة إذا الواحد حب أكثر من وحدة ؟! هي صفة طبيعية عند الرجل ولو مو هيك ، ما كان رب العالمين سمحلو بأربع زوجات !!

أي سؤال أو نقاش حلو هذا الموضوع الرجاء إرسال رسالة خاصة,
وشكرا
أبو أسامة,

هلا نحنا بعصر صار الواحد بتزوج بدون ما ياخد أحيانا راي أهلو او لان اهلو مو موافقين بقوم بروح بيتزوج مع يلي بحبها خطيفة وانا بصراحة مو ضد الزواج من دين اخر بس المجتمع بيتطلع عليك كأنك عامل شي عملة او كانك كفرت استغفر الله

هاد الراي الي بدي اسمعو
نشفتولي دمي وما حدا حكى هالحكي
يعني كلكون حكيتو عن نظرة المجتمع
وفي منكون حكى على حالو
بس الاغلبية كانت خايفة من الفضيحة او حكي العالم
بس ما حدا حكى المنطق او الي هو بيفكر فيه
مشكورة ريانا عالمرور الرائع

لالك عشغلة
اذا حدا تجوز مسيحي مو كمان بيعبدو الله
طيب ليش بيقمو القيامة عليهن؟
بعرف وحدة مسلمة حابة واحد مسيحي صرلن 3 سنين
بس لاهو قدران يعمل شي اوحتى يروح ويخطبها وطبعا الفكرة مرفوضة من عند اهلها تمام
وهي مو ادرانة تاخد قرار تمام
طيب بنرجع لفكرتك انت ليش ما بتقد الطوائف تاخد من بعض
سؤال محير
اجابتو كمان محيرة فيك تقول اد ما اعدنا لنحكي بهل لموضوع مارح نوصل لنتيجة
الفكرة مرفوضة عند المجتمع
يعني
مافي اجابة
والحب لازم تكون نهايتو الماساة
يا امى اذا كانو عنجد بيحب بعض بيروحو خطيفة والله يعينن

بس اجابة وافية مافي
طيب فيني اسالك هي رفيقتي ليش مو ادرانة تاخد قرار ولاهو ادران لانو حدا بدو يتنازل لحدا والسؤال اذا فرضا حدا وتنازل وتزوجو وبعد الزواج اكتشفو انن ما بيناسبو بعض يا حزرك شو بيصير بعد هيك خطوة
التلك مافي اجابة على الموضوع
وكمان لاسف نفس الشي بين الطوائف
بس السؤال مين يلي عمل هي الطائفية
من زمان كلون كانو ضمن اسم المسلمين
ليش هلاء صرنا نحكي بل طائفية لالك لانو اسرائيل بدها توقع بين العرب وبدها تعمل حرب طائفية لحتى نضل ضعفى ولحتى تكون هي الوحيدة المستفيدة بينا
عرفت ليش
مشان نضل ضعفى
مشان نضل مهزومين
ليش بل عراق هلاء مو في حرب طائفية بين السنة والشيعة ليش مين يلي عملها
ليش عوقت صدام ما كان في هيك حرب ؟
مشان يضلو ضعفى
اسفة على الاطالة بس التلك اذا بنضل عم نحكي ما بنخلص

زائر

حكيــــــك كتير منطقي لولو بموضوع الطوائف
ومتل ما قلتي ع زمان الرسول (ص) ما كان في لا طوائف و لا مذاهب وكان كلهم تحت راية وحدة إسمها راية الإسلام
وكلامك بهالنقطة ما علي أيا جدل و ببصملك بالعشرة علي
.......
بس في نقطة كتير خطيرة أطرئتيلها ما في بوافقك عليها بنوب

المرأة المسلمة وفق الشريعة الإسلامية لا يجوز لها أن تتزوج إلا من مسلم
يعني بالنسبة لرفيقتك المجتمع و الأهل مو هنن العوائق الوحيدة يلي بتوقف قدامها
كمان في الدين و الشريعة و القرآن
وبتصور إنو نحنا فينا نتجاهل كلشي وقت نكون مصرين إلا الدين

صحيح حكيو البرنس....

كتير غلط الواحد يتزوج و حدة من غير دين...

أيمك عن أنو أنو نحن إسلام و النبي موصي البنت المسلمة ما تاخود مسيحي...

لو تزوجو....الولاد تبعون شو مصيرون؟؟؟....شو لح يكون دينون؟؟؟....على دين امون و لا أبون؟؟؟....صعبة كتير هالنقطة....

أنا بشوف أنو غلط كتير كبير انو ابدا بعلاقة عرفانة انو نهايتها مسدودة....حب شب مسيحي 3 سنين و لا اربعة و عللئ حالي فيه و انا بعرف انو مالح نكون لبعض و لح نتعرب أكتر كل ما طولت علاقتنا....مو منطق

أنا هيك رايي
سلام

» الإنسان قبل (الحب) وبعد (الحب) وعند (الحب) ...
» رايك حول عضو
» شو رايك بهيك بنت...؟؟!!