(نقاش)..كيف تتصرف بالمكرو باص..

كيف بتتصرف بالمكرو باص ..

مررررحبا شباب من خلال مشاويري الشبه يومية بالباصات والنقل الداخلي والمكرويات أكيد لأني مو بتاع تكاسي بقا بشوف يوميا أصناف كتيرة من الناس من خلال وجودي بالمكرو ..وأكيد أغلب الشباب والصبايا هيك ..بقا شفت أنو بالمكرو ومن خلال هالأعدة يلي يمكن بضل من خمس دقايق لربع ساعة بتصير شغلات كتير وحبيت أحكي عنها ...

بلش بالشباب ..يعني بتلاقي الشب الموزن طول الطريق ويلي بيضل قدام الشباك وهيك ليوصل ..وهاد أحسن شي .

وفي نوع تاني يلي بحاول يطلع الموبايل وبيستعرض جهازو قدام الموجودين والموجوادت ..للفت النظر

ويلي ما بيحلالو يفتح ماسينجر الموبايل الا بالمكرو وعلى اساس هو بتاع نت وماسينجر وقصص ..

ويلي ما بيحلالو يحكي مع رفقيتو الا بالمكرو وقدام عشر أحدشر متفرج ..وبصير يعاتبها ويصالحها والعالم كلها عم تتابع هالمسلسل ويلي بأجل نزلتو لتخلص الحلقة ..

وفي هاد النوع السئيل يلي بيضل بيشأل الحاضرين واحد واحد أو وحدة وحدة من فوق لتحت وغالبا بيعد وظهرو للشوفير ليشوف الكل وبكون امو داعيتلو اذا بكون الباص معجوق وبتعد وحدة جمبو وببلش حركات اللاشعورية بالاقتراب من البنت هيك لحتى يا تاكلها البنت بجنابها يا ياكلو شي كلمة منها..

وفي نوع أخير هو يلي بتحل عليه الكفونة فجأة أنو بكون المكرو تليان للأخير بتأشر بنت بنلاقي عجقة بتبطل وإذا بينتخي وبصير على طرف المكرو بالأراضي و ببعدلها و هو أذا بتفتحلو مخو بكون اذا بيجي أبو ما ببعدلو ..مشان كلمة شكرا كلك زوء..

منجي للبنات ..هو أكيد الأصناف هون أقل

كمان ببلش بالنوع الأول الموزنة طول الطريق وعينها على الشباك هيك لأخر الطريق..

في نوع يلي بتلاقي بصير بعدل المكياج بالمكرو لك بالمكرو يلي كلو مطبات وكواع يعني بس بدي شوف شلون بتدها تحط الكحلة او الحمرا يعني اذا لف كوع الشوفير اذا ما طارت عينها للبنت بطير علبة المسكرا كلها...

ويلي بتلاقيها راكبة ولح تطلع من الشباك يا حرام لأنو قاعد جنبها السئيل يلي حكيتلكن عنو من شوي وهي يلي بصير مع أغلب البنات بأغلب قعداتهن بالمكرو..

أكيد كل يلي كتبتو بيختلف حسب خط المكرو والموجودين فيه..

هاد الموضوع من فكرتي وكتابتي انشاء الله يكون عجبكن وأكيد كل يلي كتبتو صاير قدامي وأكيد في أحداث أكتر من هيك صايرة معكن هات لنشوف اذا في شي جديد حكولنا ياه وحابب شوف كل واحد يحكيلنا بصراحة شلون بيتصرف ....

لك صحي عم استنا ردودكن..

والله يا عمي حيدر موضوع بلامس الواقع تبعنا وكلو حئيئي
انا من جهتي والله يا شررررريك يمكن فيني عادة وعصوووم بيعرفها المكاري الكبار ما بركبون
وبضل بستنى مكرو لحتى اركب ئدام منشان ما شوف حدا ورا وعجئة ورا
بس احيانا بفتح نت من الموبايل بس الكل من الشلة بيعرفو انو موبايلي بكون بالمكرو صامت
انا ما عم اعمل حالي مثالي
بس والله هادا واقعي
يعني اذا ما كان حدا معي يمكن ما بركب ورا بالمرة
وبضل بستنى لحدا يجي مكرو فاضي ئدام او بروح مشي او باخد تكسي
والباص الاخضر ( النقل الداخلي ) وئت اطلع فييييي بوئف توئيف لانو ما بحب كون حدا اكبر مني وائف وضل اعد انا
وعصوووم بيغعرف لانو يمكن انا ويا تئريبا عطول مع بعض
موضوعك حلوووووووووووووووووو كتيرررررررررررررر الله يديمك يا حيدوووور

مشكوووووووووور عمور مرورك نورني ..
بس ليش ما حدا رد غيرك ؟؟؟
هاد يا أما الموضوع ماعجبهن يا أما كانو من التاس يلي حكيت عنهن
:lol: :lol:

موضوع راااااااااائع حيدر ونقاش وآراء مشوقة
أنا من جهتي كمان بركب باصات كتير عقبال ما أخلص
أنا بكون كتير طبيعية بالباص إذا رن الموبايل برد بس ما بحكي قصص شي أكيد الضروري وبس
وإذا كنت راكبة مع حدا بعرفو منحكي بس بصوت واطي
الإنسان لازم يحترم كل الموجودين ويحاول ما يلفت النظر بتصرفات بلا طعمة
والله يريحنا كلنا من هالمعاناة ويصير عنا سيارات
مشكووووووووور حيدر
موضوع حلوووووو

اول شي سلاااااااااااااااام حار لك صديقي حيدر العزيز
بالنسبة الي اول شي انا ما برد علىالموبايل بالمكرو لذلك ما كتير بطلعوا او بفتحو بالمكرو او الباص
بالنسبة للنا انا يا بعد ادام ويا بعد على الشباك بصراحة فيني عادة اني بحب كتير اني فكر بالمكرو بشغلات كتيرة او بشي جديد عم اكتبوا واما بالنسبة للبنات فما بحب اطلع بحدا بالمكرو مشان ما ننفهم غلط
وحكيك كلو صح ونظامي ما عدا شغلة المكياج ما شفتها بس ضحكتني
مع تحياتي الك
بورد

لك يا هلا رهام مرورك نورني
وأنت عدنان والله مرورك على راسي والف تحية مني الك تحية..

انا ياشباب بركب وبحط سماعات بإدني مشان لا أسمع اغاني الشوفير المعته ( طبعا بيختلف من خط لخط ) ومشان ما أسمع حكي اللي وراي اللي بيجلط او بخليك تجن من الحكي اللي بلا طعمه وهي القصص

بس في شغله

==============

ويلي ما بيحلالو يفتح ماسينجر الموبايل الا بالمكرو وعلى اساس هو بتاع نت وماسينجر وقصص ..
============

انا بفتح مسنجر كمان بالسيرفيس بس مو لأنو بالسيرفيس بس لأنو انا عالنت 24/24 ساعه بقى مشان هيك بضل معي وفاتحو للمسنجر

ههههههههههههه

ههههههههههههههه حكي كتير تمام 100/100
وانا ما برد عالموبايل لانو ما بحب احكي وممكن احكي بصوت واطي
وانا من النوع يلي بطلع عالشباك وبفكر بالمكان يلي بدي روح عليه
مشكور حيدر كتير عالموضوع ويغطيك الف الف عافية بس نسيت تذكر نوع
يلي بيكون نايم وبسابع نومو ويا حرام يمكن بيكون وصل ومالو عرفان
:شكرا :

والله يا حيدر يا حبيبي انا من الناس يلي بطلع بالميكرو
وبقعد وين ما كان وطبعا بعاني من شكيلات وشكيلات والله لا يفرجيك
بحاول دايما اسرح بافكاري لحتا ما ازعج حالي بهيك ناس
بس كمان والله في ناس قمة الادب ولييييييي بس على هالادب بيعملك زلزال ليقلك خووووووود عطي واحد
بس مضطر تساير لانو اذا بدك تعلق معو راح عليك مشوارك اكيد
في حكي والله كتير بس مو رايق هلا

مشكورين على المرور ..
لا رجائي انا أصدي مبين أنو يلي بيفتح الماسينجر للتشبيح مو أكتر ..

بلاك روز مرورك نورني بس والله بعد ما حطيت الموضوع أجت صبية وقالتلي أنو هي من هاد النوع يلي حكيتو عنو أنو بيسحبوها نومة ..
ههههههههههههههههههه الكن مين هي..

على راسي أنوس الورد والله لا يعكرك ..

اي شي حلو

انا من الناس يلي بيحط السماعات بإدنو

وبالنسبه للي بيبعد للبنت مشان تقعد بدالو هاد انسان راقي

نورتني عبود ..على فكرة هاد من المواضيع يلي بعتبرها مواضيعي المميزة بالمنتدى ..وتشكر لأنك زكرتني فيه ..

موضوع: يسلمو عقرب السبت يناير 02, 2010 6:20 pm

يسلمو عقرب كثير هو واقع مفرض عليما ويسلمو كثير بس انت من ي واحد منهم .....................!

زائر

انا بصراحة بشغل الماسنجر تبع الموبايل
بقول احسن ما ضيع الوقت

وموبايلي مو شغلة كبيرة حتى شوف حالي فيه

بس موضوع راجل وكتير حلو
والحلو في الصراحة
مشكوررررررررررررررررررر

والله اذا بدك للصراحة انا بقعد حد الشفير قدام وببلش طق الحنك
والغاية من هالشي انو اتهرب من الدفع !
اكيد ما ني مبسوط بحديثو الفاضي
بس سر المهنة هيك بدو

رررررراااااااااائع استاذ حيدر
انت اكيد من النوع الي بيقعد بالمكرو وبيصير يطلع عالناس ويشوفون شو عم يعملو
هههههههههههههههههههههههههههههههههههههههههه

لك والله موضوع حلو
بس في عنا على خط جرمانا
في ناس كتير بتحكي بالموبايل وبيبلش كذب
متل
اي اي عمو اي خلص ابعتلي الطلبية تبع المليونين
ههههههههههههههههه
بتفكر انو شي رجل اعمال وطالع بالمكرو لانو سيارتو معطلة وما معو كاش ليطلع بالتكسي معو فيرزا كارد
هههههههههههههههههههههههههه
وكل ما تطلع بالمكرو بتلاقي قاعد في
لانو السيارة ما كانت تتصلح
ههههههههههههههههههههههههههههههههههههههههه
لك سيدي لله في خلقه شؤون

بس يسلمو ايديك كتيرررررررررر حلو

(نقاش)..كيف تتصرف بالمكرو باص.. T043

لك تسلمولي أحلى شباب والله نورتوني ..

وأي نبيل هاد يلي ما كانت سيارتو تتصلح عرفتو ...هههههههه

هلأ أنا لو ما كنت من النوع يلي بيطلع على العالم ما لقيتوني كتبت الموضوع ..ههههههههه

أفكار حلوة

» الفرق بين الشباب و البنات بالمكرو او بالسرفيس
» كن صديقي (نقاش)
» نقاش للشباب والصبايا